AV女優網上辣火頭先爆同保方玩3P

天下烏鴉一樣黑？今年國際球壇偷食事件無日無之，繼高治同朗尼之後，就連好老公形象深入民心嘅保方都賴嘢！西班牙艷星瑪莉亞（Maria Lapiedra）向《每日體育報》爆料，指佢同保方曾經大玩3P，又爆保方已經對老婆冇晒性慾，分明搞破壞博見報，不過瑪莉亞就預告即將會踢爆另一位偷食球星，一眾賤男今勻人人自危咯！

現年26歲嘅瑪莉亞係西班牙3線演員兼模特兒，大學畢業之後就從事色情電影拍攝工作，雖然呢位三級片女星擁有36-25-36魔鬼身材，奈何始終撈唔起，今次爆大鑊，唔少人認為瑪莉亞係想效法碧咸嘅「嫖妓門事件」借保方上位，不過瑪莉亞就講到似層層，驚人言論肯定搞到呢位意國門神一身蟻。

教唆保方老婆離婚

瑪莉亞向西班牙《每日體育報》透露，佢喺都靈一間酒吧認識保方，2人Keep住有互發短訊聯絡，卒之喺今年8月25號，保方帶埋個朋友出嚟同瑪莉亞發生咗關係，仲喺泳池邊大玩3P。瑪莉亞表示：「保方以為自己捧過世界盃就係英雄，恃住出名、有錢就為所欲為，我為咗女人嘅尊嚴一定要爆佢大鑊！」

呢位艷星驚保方唔死，竟然教唆保方老婆莎維杜娃離婚：「保方同我講佢對你（莎維杜娃）已經冇晒性慾，如果你想同佢離婚嘅話，我可以出嚟做證。」瑪莉亞除咗爆料畀報館之外，仲着住件低胸衫拍片擺上youtube數臭保方，最搞笑係保方同1隻豬嘅相輪流出現，擺明話保方蠢過隻豬。

預告踢爆另一「偷食男」

短片末段瑪莉亞仲預告會踢爆另一位「偷食男」，可以預期呢位語不驚人死不休嘅艷星將受到傳媒嘅追訪，呢位「偷食男」肯定有得震冇得瞓。呢條短片嘅西班牙文版本已經突破15,000點擊率，近日宣布將會喺明年1月傷愈復出嘅保方，仲未為事件作出回應。

AV女Vs人妻

瑪莉亞 Maria Lapiedra

出生日期：1984年7月17日（26歲）

國 籍：西班牙

三 圍：36-25-36

職 業：AV演員、電台主持、模特兒

簡 介：擁有文學學位，畢業後投身AV行業，07年嫁畀著名3級片導演Ramiro，但2人已經離婚，瑪莉亞亦都撈極唔起。

莎維杜娃 Alena Seredova

出生日期：1978年3月21日（32歲）

國 籍：捷克

三 圍：37-24-36

職 業：模特兒

簡 介：15歲開始做Model，20歲贏咗捷克小姐亞軍，98年更加奪得世界小姐第4名，堪稱意大利最具分量嘅WAG。莎維杜娃同保方結婚4年，現時有2個小朋友，但做咗人妻之後仍然同恩沙基、韋利甚至阿馬利傳過緋聞。