新一季嘅NBA將會喺本月底開鑼，列強近期頻頻進行友賽練兵，當中紐約人嘅表現最Sharp醒，一來大軍陣容變動唔算大，夾慣夾熟自然有默契，二來係新兵史杜迪米亞對辦，亨格比利睇好呢支東岸球隊有作為。
講開史杜迪米亞，呢位仁兄自從過檔紐約人後新聞多多，又大讚當地多索女，又話自己仲係單身，似乎一心想搵食。ESPN前日出咗本健身雜誌，邀請40位體壇明星赤裸上陣，當中「A米」就繼續出位，喺泳池遮住下體扮入樽，尺度勁大膽，惹嚟極大回響。
尋晚有記者拎本雜誌畀奧尼爾，佢講笑話除非靠Photoshop執相，否則唔夠膽好似A米咁拍裸照，亦大讚「A米」身形弗！「A米」裸照贏盡口碑，可憐07年新秀狀元奧登就慘被揶揄，呢位拓荒者中鋒用嚟鎅女嘅裸照上年曝光，有球迷話ESPN應該搵奧登拍封面喎！