電影《Inception》全球熱播，勒邦占士唔知係咪睇完主角里奧勒度狄卡比奧幫人潛植意念，有樣學樣，據美國《TMZ.com》爆料，占士早前豪花6位數字美元，搵猶太教祭司幫佢潛植意念，希望嚟緊喺商業會議作出精明決定！

據《TMZ.com》報道，為咗嚟緊一次重大商業會議，勒邦占士最近秘密搵人約咗一位叫平托嘅猶太教祭司進行會面，希望對方可以畀到佢一啲商業決策，有助之後進行更精明嘅商業投資。據一名有參加呢次會面嘅消息人士爆料，雙方喺一艘於紐約出海嘅私人遊艇上會面。

熱火「Big3」首戰砌綠軍

《TMZ.com》更刊登一張占士同平托會面嘅相，入面可以睇到占士握住祭司嘅手滿臉虔誠。據講現年37歲嘅平托雖然只係識講希伯來語，但喺美國商界好出名，曾經同唔少商界精英進行會面，目的係為佢哋喺嚟緊嘅事務作出指引，正因為咁，收費當然唔平，消息指「大帝」今次搵佢作私人「潛植意念」就足足付出6位數字美元做酬勞，睇嚟植入嘅意念唔淺，隨時落到第四層。

另外，NBA尋日正式公布新季賽程，結果同我哋之前透過《ESPN》率先披露一樣，就係獲勒邦占士同保殊加盟，同韋迪組成「Big3」嘅熱火，將喺揭幕戰（香港時間10月27號）硬撼尋日正式獲奧尼爾加盟，組成「Very Big4」嘅「綠軍」塞爾特人。至於「大帝」就會喺12月3號首次倒戈騎士。湖人對熱火嘅冠軍前哨戰就會喺聖誕節檔期舉行，常規賽更會首次移師歐洲作賽，速龍同籃網將喺下年3月5同6號到英國倫敦打常規賽！

拉舒華萊士退休

最後，塞爾特人尋日正式放棄拉舒華萊士，《ESPN》指呢位打咗NBA15年嘅老將會選擇退休！