搵份好工，泊個好碼頭，有邊個唔想？勒邦占士同保殊就搵到好東家，加盟熱火組成「夢幻Big3」，不過唔係個個都咁好彩，曾經喺球壇叱咤一時嘅三大過氣巨星奧尼爾、「T-Mac」麥基迪同「AI」艾佛遜，家陣仲喺自由身市場等人救上岸，偏偏連周圍搵緊配角嘅熱火，都話唔想破壞「夢幻Big3」嘅和諧關係，當佢哋透明。堂堂巨星淪落做豬頭骨冇人要，如果最終搞得唔好衰收尾焗住退休，就認真陰功囉！

奧尼爾口臭減價都冇人吼

全盛時期係NBA最有統治力球星嘅奧尼爾，如今38歲已被唔少人視為高薪低效嘅「大廢物」。最慘係佢雖然仲有多少實力，但衰在把口唔收得罪人多，依家就算肯減價求存，據聞都只得鷹隊肯諗吓接收咋！

鷹隊只肯畀1560萬年薪

想當年離開熱火加盟太陽，竟然狂數舊東家不是，搞到家陣想返熱火撈多個冠軍都冇人睬佢。最慘佢人工唔低，上季喺騎士仲收緊2,100萬美元年薪，就算話今年肯降格收份中等合約去到580萬美元，似乎都冇人理佢，消息話鷹隊都只係肯畀200萬美元（約1,560萬港元）年薪，你唔肯減價咩？收山啦！

小牛曾經諗過搵佢，但最後打退堂鼓。塞爾特人總經理安治承認同「巨無霸」傾過，不過話成事機會微。左睇右睇，佢去鷹隊起碼上陣時間機會多，仲有得做「大佬」，算係唔錯選擇吖！

奧尼爾（中鋒）

出生日期：1972年3月6日（38歲）

威水史：4屆NBA總冠軍、3屆NBA總決賽MVP

冇班落衰啲乜：口臭、人工高、性格麻煩

最後機會：塞爾特人、鷹隊

成事指數：★★★

註：5★為最高

艾佛遜太自我神憎鬼厭

01年NBA最有價值球員、外號「答案」嘅艾佛遜，近年受到傷患同家庭問題影響，斷斷續續比賽，加上太過自我，搞到有多少神憎鬼厭。雖然家陣佢話想復出，無論打邊隊都肯，但直到依家都未見有球會肯回應。

要圍繞佢打造球隊

雖然身高得6呎，但卻係4屆常規賽得分王，艾佛遜嘅實力根本毋庸置疑，只係佢太過自我性格，要球隊圍繞住佢去打造，結果喺近年演出滑落之下，難免成為豬頭骨，冇乜人肯接收。09年11月由灰熊回歸母會76人，受到英雄式歡迎，點知表現平平，到今年2月更以照顧患病愛女為由，宣布無限期離隊。

自從月初宣布有意復出之後，雖然一度同熱火扯上關係，但消息指成事機會都唔大，依家唯一希望，就係76人念舊肯收番呢個老英雄，否則AI嘅球員生涯就會面對終極答案，正式退休！

艾佛遜（得分後衞）

出生日期：1975年6月7日 （35歲）

威水史：4屆NBA得分王、1屆NBA常規賽MVP

冇班落衰啲乜：性格自我、表現嚴重下滑

最後機會：76人

成事指數：★★

玻璃人麥基迪抖多過打

兩屆NBA常規賽得分王麥基迪，曾經被視為聯盟內最恐怖嘅得分武器之一，可惜近年一傷再傷之下，「T-Mac」慘成「玻璃人」，上陣時間唔多兼夾演出大跌Watt，由球隊主力變成大茄。雖然家陣有消息話佢得到湖人同塞爾特人垂青，但如果佢再放唔低爭做主角心態，前程一樣令人擔心。

97年出道，先後効力過4支球隊，但大多數都係不歡而散，「T-Mac」雖然有卓越天分，能力備受認同，但至今仍然同總冠軍無緣。今年已經31歲嘅佢，開始踏入球員生涯最後衝刺階段，暑假前曾經講過如果操唔番狀態，隨時會掛靴，但始終名氣夠，近排先有快艇搵佢跟操，湖人同塞爾特人都想搵佢做綠葉，「T-Mac」球員生涯應該仲未玩完，但可唔可以有第二春？都仲要睇佢命數！

麥基迪（小前鋒/得分後衞）

出生日期：1979年5月24日（31歲）

威水史：2屆NBA常規賽得分王

冇班落衰啲乜：扮大牌、人工高、玻璃人

最後機會：塞爾特人、湖人

成事指數：★★★★