自從熱火組成「三巨頭」後，好多人都唔睇好佢哋嘅前景，「波神」米高佐敦日前亦暗示唔睇好佢哋，直言自己從來冇諗過組「三巨頭」，不過熱火主將韋迪就賴理批評，認為呢啲反對聲音正好成為佢哋爭標嘅最大動力！

「大帝」勒邦占士早前加盟熱火，同韋迪、保殊組成NBA史上最強「三巨頭」，睇落好似好勁，不過曾經幾乎以一人之力，帶領公牛6奪總冠軍嘅米高佐敦，對「三巨頭」就唔係咁睇好：「毫無疑問佢哋一定要打過先知發揮係點，不過我從來冇叫過『小鳥』布特同『魔術手』莊遜打埋同一隊，只係一直諗點樣擊敗佢哋！」

鍾斯放棄高薪留熱火

唔止佐敦，其實近期NBA專家都對熱火「三巨頭」唱反調，不過韋迪話呢啲批評絕對唔會影響佢哋，反而會成為佢哋前進嘅動力。至於之前同熱火約滿成為自由身嘅占士鍾斯，據報更放棄馬刺開出1年600萬美元合同，準備接受熱火開1年100萬美元合同：「咁好嘅機會（爭標）我點可以錯過？」