潮爆球星基斯坦奴朗拿度日前自爆做未婚爸爸，震撼全球，事件至昨日再有突破性發展，原來一向思想前衞的他，今次是畀足錢找「代母」買肚生仔，早就處心積慮「要仔唔要乸」。據C朗二家姐Katia透露，小生命與C朗十足十「餅印」一樣，出世時重9磅8安士，有消息指，C朗更會用自己名字朗拿度為愛兒命名，對他肯定「錫到燶」！

去年暑假美國搵代母

據葡萄牙《每日新聞報》報道，C朗是在去年暑假到美國聖迭戈度假時，找「代母」實現做未婚爸爸之夢，只是「代母」身份至今依然成謎，只知道是美籍女子，並且已收足錢不能曝露身份。

該報昨日更特意走到C朗在維拉摩雷新開張的「CR7」時裝店，找來C朗二家姐Katia做專訪，為「小C朗」大起底。Katia表示：「佢（C朗）梗係開心啦！做老竇喎！雖然BB仲好細，好難真正睇到BB特徵，但我真係覺得BB同佢成個餅印一樣，都係啡色眼睛同啡色頭髮。」

愛兒同叫「朗拿度」

Katia指BB好乖和好靜，暫時只識食和瞓。至於Katia兩個囝囝見到BB都好開心，歡迎這位新成員加入他們的大家庭。目前「小C朗」與C朗一家住在維拉摩雷新買入的豪華度假屋之中。

據知，「小C朗」是在上月17日出生，出世時身長53厘米、重9磅8安士。當時是C朗代表葡萄牙戰罷科特迪瓦兩日後，大軍正在備戰對北韓，但C朗始終未有向隊友透露喜訊。其後C朗在16強不敵西班牙後，隨即趕返阿爾加維與愛兒見面，然後近日才再往西班牙「工作」。

有關BB名字，Katia堅稱要等C朗在西班牙辦完公事，返回葡萄牙才會公布，然而據當地電視台RTP透露，C朗將用自己一樣的名字「朗拿度」為愛兒命名，也許是想囝囝能與他擁有一樣的驚人足球天分吧！

舊愛寸有8萬個女友

自C朗日前於Facebook及Twitter公布喜訊後，短短18小時，便有超過4萬個球迷回覆並恭喜C朗，儘管如此，與C朗關係密切的天主教教父蘇沙卻表示，由始至終未收過任何有關消息。更有報章為C朗初為人父一事訪問部分C朗舊愛，其中Nerida Gallardo不只未有表態祝賀，更「寸爆」表示：「每個星期佢都會同唔同女子走埋一齊，喺我之後有幾人同佢有關係？我諗有8萬個啦！」