塞爾特人「三巨頭」最後主場戰？NBA總決賽第5戰聽朝8點將喺塞爾特人主場爆發，不過「綠軍」賽前卻突然傳出「三巨頭」季尾將各散東西，雖然教練李華士極力否認，惟世事無絕對，更令這場大戰增添幾分話題！
美國《ESPN》近日有報道話，無論今屆NBA總決賽戰果係點，聽日一戰，好可能係皮雅斯、雷阿倫同加納特「三巨頭」最後一次喺塞爾特人主場亮相。事關雷阿倫喺今季尾將成唔受保護嘅自由身球員，而皮雅斯亦有權提早終止合約。
李華士都考慮離隊
對於以上報道，有傳言為咗多啲時間陪屋企人，正考慮今季尾離隊嘅「綠軍」教練李華士表示，球隊仍未討論下季組軍方案，不過佢本人就希望可以原班人馬出戰：「我當然希望簽番雷阿倫，我覺得加納特經過上季手術長抖後，下季表現一定會更好，所以我哋覺得球隊仍未為各球員關閉大門。」事實上，有專家分析，由於雷阿倫每日仍保持高強度嘅科學訓練，好可能仲可以喺NBA打多5年。
湖人旨意奧當阿堤斯
相對於塞爾特人，湖人陣前最大問題就只係中鋒拜林嘅傷勢，不過教練積遜已制訂「B計劃」，除咗會增加後備中鋒邁賓加嘅出場時間，相信只要奧當同阿堤斯打出水準，將成湖人喺第5戰勝出關鍵：「我對阿堤斯好有信心，雖然佢喺今個系列賽手風麻麻，但防守依然靠得住。」