尋日朝上演嘅NBA總決賽第4戰，塞爾特人主場以96:89勇挫湖人，總場數扳平2:2，不過贏波功臣唔係「三巨頭」，亦唔係朗度，答案係格連戴維斯同尼特羅賓遜兩名後備，賽後尼特羅賓遜更用卡通「史力加同驢仔」比喻佢同「Big Baby」係最佳拍檔。

其實塞爾特人同湖人尋日咬得好緊，不過「綠軍」後備格連戴維斯神勇嘅演出，卻成為比賽嘅轉捩點。藉着湖人中鋒拜林因傷提早退下火線，綽號「Big Baby」嘅戴維斯喺比賽中如入無人之境，當中喺第4節更射入全場18分中嘅9分，賽後戴維斯自信咁話：「我覺得自己今晚就好似一隻野獸，冇人可以阻到我。」

羅賓遜：好似史力加拍驢仔

除咗戴維斯，其實塞爾特人尋日全部後備都有貢獻（見附表），另一位「功臣」首推尼特羅賓遜，呢位3屆NBA「入樽王」，全場上陣17分鐘勁入12分。賽後佢話：「我哋一班後備都知今晚要帶力量畀球隊，我哋付出愈多，球隊嘅攻守就會無懈可擊。」對於佢今晚同戴維斯成為贏波英雄，羅賓遜巧妙地用卡通比喻：「我哋就好似史力加同佢嘅拍檔驢仔咁，永遠唔可以分割！」

其實湖人喺完場前曾經追到好近，一度令喺第4節大部分時間派後備上陣嘅「綠軍」主帥李華士猶豫，點知朗度同「三巨頭」反而求李華士繼續，李華士話：「唔好換走佢哋！唔好換走佢哋！佢哋打得好好，今場可以話係我有史以嚟聽到一班正選喺後備席歡呼最大聲嘅一次。」