話咁快NBA總決賽已經打咗3個回合，但賽後最多人講唔係話邊個好波，而係球證嘅判決，當中「綠軍」教練李華士就最激動。事實上有數據顯示，湖人今屆的確獲球證偏幫！

湖人同塞爾特人喺今屆總決賽出現好多火爆事件，球證頻頻吹罰睇落好似想壓制場面，但卻大大影響球賽嘅流暢性，好似第3戰後，幾乎兩隊所有職球員都對球證有微言。其中塞特爾人教練李華士就最激氣：「我唔係成日send信畀聯盟投訴，不過今朝我send咗好多。」

斥費沙係插水王

李華士直接表示最令佢激氣係費沙mark雷阿倫，佢覺得費沙成日插水：「費沙係目前聯盟博進攻犯規最叻球員，不過我覺得佢有啲係真，有啲係扮跌，可惜唔係咁易分辨到。」

其實又難怪李華士咁嬲嘅，事關有數據顯示，今屆NBA總決賽球證的確有偏幫湖人嫌疑，好似湖人喺今屆總決賽平均每場被吹罰25次，比08年少1次；08年每場平均獲28.3個罰球，但今屆就升至32個，相反塞爾特人喺08年每場平均被吹罰24.7次，但今屆就升至28次，但罰球就由08年嘅31.8個跌至今屆嘅28.7個，「綠軍」今勻認真係腹背受敵。