薑都係愈老愈辣！喺第2戰狂入3分成為「綠軍」英雄嘅雷阿倫，估唔到尋日喺第3回合竟然變身「入球黑洞」，畀湖人老將費沙mark到一戙都冇，而且費沙更喺第4節代替高比拜仁擔當「得分先生」，帶領湖人作客以91:84擊敗塞爾特人，總場數再次領先2:1，遺憾中鋒拜林受傷，聽日未必可以披甲。

經歷第2回合慘敗嘅教訓，湖人尋日打得格外留神，當中高比拜仁喺頭3節狀態大勇勁入25分，一度帶領「紫金兵團」拋離塞爾特人17分，不過「綠軍」喺末段逐漸上力，喺第4節初段一度追剩落後1分，不過就係呢個關鍵時刻，湖人老將費沙發揮佢嘅大賽經驗，喺第4節勁入11分，其中喺完場前48秒，搶到防守籃板後由自己籃底帶到對方籃底，再喺「綠軍」3人飛身封波下成功剷籃兼「AND 1」，將「綠軍」徹底打沉。

拜林傷膝Game 4未必打得

喺第4節只入4分、全場入29分嘅高比拜仁，賽後大讚費沙：「費沙今晚實在做咗太多太多超出佢工作範圍外嘅事，佢幾近擔起球隊贏波嘅責任。」至於全場射入16分嘅費沙賽後接受訪問時就眼濕濕：「我哋仍然對上場喺主場輸畀塞爾特人耿耿於懷，為咗唔想重現08年嘅歷史（總決賽輸畀塞爾特人），我哋今晚特別專心比賽。」

放大圖片	放大圖片	放大圖片

其實費沙尋日除咗進攻之外，防守亦一樣勁，全場只係被對手喺自己面前射入1球（見附表），當中最勁係mark到上場射入8個3分波嘅雷阿倫一戙都冇，射13球全炒，只靠罰球得2分，成為NBA近20年總決賽最差、兼NBA總決賽史上第2出手最多但唔入紀錄，唯一較值得「安慰」嘅係，「綠軍」成功搞傷湖人中鋒拜林嘅膝頭哥，聽日第4戰上陣成疑，為保爭標機會，「綠軍」聽日再度主場出擊絕對不容有失，少讓3.5分應該可以開番上盤！