高比同加素合力策劃完美開局！尋日上演嘅NBA總決賽首回合，戰情極之火爆，湖人最後憑高比拜仁同加素合力轟入53分，主場以102:89大勝塞爾特人先拔頭籌。過往10年，NBA總決賽首戰主場贏波球隊贏冠軍比率高達80%，「綠軍」想爭標真係要加把勁啦！

曾喺04年1場比賽防守皮雅斯時拉甩對手條褲嘅阿堤斯，尋日再度交手喺中場開波前已經為爭位你推我擁，開波唔夠27秒，兩人又因為喺籃底爭位，手肘扣手肘雙雙跌落地，結果各食1次T-foul，之後兩隊比賽氣氛仍然好火爆，賽前講過話要博塞爾特人Charges（進攻犯規）嘅湖人，果然講得出做得到，最終雙方加埋共出現54次犯規。

全場54次犯規

不過比賽過程愈粗野，湖人反而愈打愈起勁，特別係高比拜仁，全場勁入30分，加素亦有23分同14個籃板進帳，兩人全場得分僅比「綠軍」5名正選少20分，籃板僅輸1個（22 Vs 21），可以話湖人贏波嘅最大因素。

反觀塞爾特人全隊只得皮雅斯表現較好，老將雷阿倫更因為mark唔住高比搞到個犯纏身，全場只上陣27分鐘，得12分進帳。

積遜攞完頭彩例必勝出

對於呢場波打得咁火爆，今仗表現突出嘅湖人前鋒加素賽後表示係意料中事：「我一早估到呢場波會有好多埋身肉搏。經過連續3年殺入總決賽，我哋完全明白賽事嘅性質，你一定要比對手夠狼夠硬淨先可以取得成功。」

雖然尋日只係今季總決賽首場賽事，但賽後一切有利數據已經傾向湖人身上，首先近10屆NBA總決賽，首戰喺主場贏波球隊，有8隊可以成功奪標。另外湖人教練積遜歷嚟喺季後賽47次贏系列賽第1戰最後全部都贏出。究竟「綠軍」可唔可以創造歷史？大家就記住留意香港時間嚟緊禮拜一嘅Game 2啦！