隨住勒邦占士下個月1號就恢復自由身，美國各地區近日已開始出招招攬「大帝」，當中以紐約市最瘋狂，竟然連市長彭博都走出嚟呼籲全城市民說服占士加盟！
紐約市市長彭博最近加入咗當地一個組織所搞嘅活動，目的係說服占士加盟紐約：「紐約啱晒『大帝』，世上冇其他地方比紐約更好住、比賽或贏波。紐約球迷好想勒邦占士加盟。我哋正搞緊一個呼籲占士轉戰紐約嘅活動，希望集合大家嘅力量同創意，話畀占士聽點解佢要嚟紐約。」
據講呢個組織嚟緊仲會發動一系列街道廣告同網上宣傳攻勢，另外仲會推出歡迎占士加盟紐約嘅T-shirt、全城的士同地標時代廣場亦會出現類似訊息，兼整咗一個cmonlebron.com網站，擺明志在必得！