萬眾期待嘅NBA經典總決賽，聽朝終於爆發！湖人為報兩年前一敗之仇，準備出奇制勝，賽前畀球員狂煲兩年前輸波錄影帶，跟手仲出獎金激勵防守，希望球員積極博對手charges（進攻犯規）。究竟使唔使得？大家就要拭目以待啦！

湖人隊中有個錄影部門，專門幫球隊錄低比賽。趁住總決賽就嚟展開，教練積遜為咗刺激球員戰意，近日就特別吩咐錄影部剪番兩年前塞爾特人喺總決賽點樣贏佢哋嘅片段，開會時放畀球員睇，當中有段影住皮雅斯喺第6戰大局已定下，完場前1分鐘喺後備席跳舞慶祝，球迷就大喊：「高比喺邊度？」搞到球員睇完都㷫合合，中鋒拜林就話：「我相信隊中每個球員都好記得當時嘅情景。」

放大圖片

放大圖片

防守獎金一次Charges390蚊

至於防守較弱嘅問題，積遜教練就決定出錢解決，頒布球員只要成功博到對手一次charges（進攻犯規），就會得到50蚊美金（約390港元）。據湖人助教咸巴講，呢個獎賞制早喺上季尾已經實行，獎金由球員嘅罰款中而嚟，好似球員平時有一次非法防守就會被罰25蚊美金（約195港元），當中費沙係球隊博到最多charges球員。賽前舒拉寶娃男友胡查錫就話：「呢個方法的確刺激到我哋博對方charges。塞爾特人係一支好識博charges嘅球隊，所以我哋一定要打得醒目啲。」既然湖人有兩大奇招喺手，聽朝主場小讓5.5分，照計應該可以打響頭炮開出上盤！