本文重點
夢幻決賽重現！隨住尋日作客以111:103擊敗鳳凰城太陽、總場數以4:2淘汰對手稱霸西岸，湖人响總決賽（The Finals）對塞爾特人呢個經典Match Up，事隔2年後終於再現大家眼前。高比拜仁就揚言要一雪前恥，報番08年一敗之仇！
湖人尋日贏波功臣首推高比拜仁，皆因佢單喺完場前2分鐘就連擸9分，最後全場勁攞37分兼破多項紀錄，包括將由自己保持、喺季後賽作客連續取得30+得分最長紀錄增至8場；季後賽累積75場30+得分，追平渣巴紀錄；史上僅次米高佐敦、同教練積遜取得合作以嚟第110場季後賽勝利，追平柏賓、積遜嘅師徒贏波最多紀錄，兼幫湖人連續3年殺入總決賽，簡直萬千榮譽集一身。
積遜高比平師徒贏波紀錄
不過賽後大家都將焦點擺喺總決賽，皆因被喻為NBA史上最成功嘅球會、奪得最多總冠軍嘅湖人（15次）同塞爾特人（17次）呢對死對頭又會相遇，呢次亦係兩軍史上第12次喺總決賽碰頭，最近一次係08年（見黃綠對決表），當時「綠軍」總場數以4:2技術性擊敗湖人封王。將第7次打總決賽、力爭個人第5個總冠軍嘅高比拜仁，賽前就話有信心向「綠軍」復仇：「08年塞爾特人喺總決賽對住我哋打得好出色，今屆係一次好機會睇吓我哋進步咗幾多。」
至於力爭個人第11枚冠軍指環嘅「禪師」積遜就話：「我好記得08年喺主場輸畀塞爾特人，同『綠軍』點樣借我哋小小犯錯贏得勝利。今年我哋將有主場之利，希望可以更加投入。」唔同之前幾圈，NBA總決賽將採取「232制」，首回合將喺香港時間嚟緊禮拜五由湖人喺主場先對塞爾特人。
