塞爾特人事隔一年再度稱霸東岸！尋日朝進行嘅東岸決賽第6戰，塞爾特人憑主將皮雅斯取得「雙雙」，拎到全場最高嘅31分同13個籃板，以96:84輕取魔術，總場數贏4:2率先殺入總決賽，教練李華士揚言「綠軍無敵5人組」，決賽對邊隊都Sure Win，誓要捧走第18次總冠軍！

去年「綠軍」因加納特受傷缺席季後賽，最終喺東岸4強畀魔術踢出局，今年復仇成功殺入總決賽，加納特嘅回歸絕對係主要原因，喺佢帶領下塞爾特人今場進攻防守相當出色，全隊5個球員得分達到雙位數字，由頭帶到尾下以96:84贏波，喺魔術手上重奪東岸王者寶座。

兩季7圈系列賽贏晒

李華士賽後表示夫添嘅綠軍玩晒：「當呢5個球員正選上陣時，我哋未輸過任何一個系列賽，相信我哋今年會有好結果。」數據顯示，兩年前加盟嘅加納特同雷阿倫，加上皮雅斯、朗度同柏堅斯嘅正選組合，一共打過7圈系列賽（見表），「綠軍」果然100%取勝，難怪李華士咁快發表勝利宣言喇！

放大圖片

放大圖片

塞爾特人一班正選表現固然舉足輕重，但後備力量亦不容忽視，好似今場後備上陣嘅尼特羅賓遜，上陣13分鐘取得13分，其中上半場更連入兩個3分球助球隊拉開比數。正選後備都有表現，「綠軍」球迷對奪冠好樂觀，全場不斷大叫「Beat LA（打倒洛杉磯湖人）！」希望湖人喺西岸都可以封王，同塞爾特人合演夢幻決賽。