茄喱啡0.7秒變主角！湖人球星阿堤斯尋日喺NBA西岸決賽第5戰基本上成場都發緊夢，不過喺完場前0.7秒卻射入關鍵一球，帶領湖人主場以103:101險勝鳳凰城太陽，總場數領先3:2！

阿堤斯今季加盟湖人後表現麻麻，尋日對太陽更發晒夢，全場9次起手入得2球，完場前56秒仲有大把進攻時間下突然倉促射3分波唔入，轉個頭喺完場前3秒畀太陽嘅積遜李察遜射入3分波追成101平手。本來全世界都諗住打加時，點知阿堤斯完場前0.7秒將功補過，搶到進攻籃板成功補入，帶領湖人戲劇性險勝，由罪人變英雄！

湖人尋日全場最Sharp醒球員係高比拜仁，佢全場取得30分、11個籃板同9次助攻，但因阿堤斯射入絕殺一球，結果被搶晒風頭。

放大圖片

放大圖片

亂射3分唔道歉

賽後阿堤斯拒絕為完場前射失3分波道歉：「我呢排射3分波有成43%命中率，所以我選擇射，我記得我射嘅時候，好多人喊『唔好射！』但一定要克服到先可以做到英雄！」另邊廂，太陽教練根特利賽前喺洛杉磯嘅餐廳食錯嘢搞到食物中毒，上半場一度坐喺後備席嘔，雖然接受靜脈注射後下半場成功復出，奈何仍阻止唔到太陽輸波。

隨住尋日贏波，湖人季後賽主場已累積11連勝，係NBA史上第4長，不過作客成績始終一般，所以聽日作客太陽讓1.5分，捧下盤為妙！