韋迪轉會睇義氣

早喺上季，各大傳媒已預言今年暑假NBA將出現多宗驚人轉會，事關好多球星都會約滿成為自由身，當中熱火球星韋迪日前就表示會同勒邦占士、祖莊臣同保殊3大球星交換意見，決定未來：「我哋簡單傾過幾次，不過仍未知對方諗緊乜同想轉會邊度。所以我覺得嚟緊需要坐埋一齊，等大家講畀對方知自己想點同聽吓對方意見。因為好多決定都會取決其他球員嘅諗法，絕對唔係淨係關自己一個事。」

雖然有傳獲得家鄉球會公牛垂青，不過韋迪透露轉會最緊要睇忠心：「熱火最好嘅地方就係佢哋好講義氣，我睇到球會對球員好好，球員亦喺場上百分百付出，我唔知公牛係咪咁。」