28/05/2010

播放本新聞相關短片

魔術誓創出線奇迹

本文重點

魔術絕地反擊!瀕臨出局邊緣嘅魔術,尋日喺東岸決賽返番主場又再得手,以113:92擊敗塞爾特人,總場數追成2:3。「綠軍」輸波不特止,內線更加崩塌,柏堅斯下場好可能要停賽,被打到暈陀陀嘅格連戴維斯亦上陣成疑,杜域侯活隨時無王管帶領魔術創造奇迹!

因為一個「魔獸」杜域侯活,兩隊尋日喺內線打到飛沙劈石,頻頻出現開肘情況。「綠軍」中鋒柏堅斯喺完半場前2分鐘內,因先後同魔術後備中鋒哥達及球證爭執,結果連食2次「T-Foul」被趕出場,喺今屆季後賽累積7次「T-Foul」,除非獲NBA撤銷,否則根據賽例下場將自動停賽。需知柏堅斯係目前NBA守杜域侯活守得最好嘅球員之一,萬一真係唔出得,「綠軍」都幾擇使。

柏堅斯停賽兩件受傷

雪上加霜嘅係,「Big Baby」格連戴維斯喺第3節畀杜域侯活開肘批中臉倒地,雖然最後爬番起身,但完全控制唔到身體左搖右擺,行到中圈更跌落球證身上,之後被換出再冇返入球場,初步懷疑腦震盪,聽日未必出得。隨後馬基斯丹尼奧斯又被侯活開肘批中出現頭暈,一度要由拉舒華萊士撐住背脊。

作客受讓唔怕捧

NBA史上從未有球隊落後0:3下反勝,但隨住塞爾特人內線崩塌,魔術反勝機會愈嚟愈高。尋日取得21分、10個籃板同5次封波嘅杜域侯活,就堅信魔術可以創造奇迹:「我覺得如果我哋繼續相信自己嘅隊友,互相信任,做到最好,乜嘢都有可能發生。」聽日魔術作客塞爾特人受讓1.5分,一於撐下盤!

雞髀拜仁