懷疑係大麻供應商

灰熊球星蘭度夫今季狀態大勇，首次入選NBA明星隊，可惜無助改善佢喺場外嘅私生活。佢最近返家鄉印第安納度假時，被指涉嫌進行大麻交易正接受調查，警方更唔排除佢可能係當地主要大麻供應商。事緣警方早前跟蹤蘭度夫嘅朋友，喺佢部車嘅暗格發現大麻同槍，而架車嘅登記人係蘭度夫。之後警方發現蘭度夫好多車都有類似暗格。警方發言人表示：「我哋仲未知蘭度夫係咪主謀，不過佢應該知道邊個揸緊佢架車，仲知道啲人係唔係用佢架車販毒。」

其實蘭度夫畀警方懷疑一啲都唔奇，皆因呢位28歲球員係「積犯」，早喺99年得18歲就因販賣賊槍被捕，之後又試過衰未成年飲酒、藏有大麻同醉酒駕駛，一睇就知唔係好人。