要數NBA最強嘅後備兵，太陽肯定係其中之一。好似尋日咁，6名副選就齊齊大發神威合共轟入54分，帶領太陽主場以115:106曬傷湖人，總場數追平2:2，認真犀利！

高比得分超越馬龍

太陽後備尋日搶晒正選嘅風頭，菲爾入咗4個3分波取得14分，巴布沙同杜利分別有14同11分，阿蒙臣有7分同7個籃板，至於達基斯就有8分同8次助攻，難怪拿殊賽後激讚：「佢哋今晚表現太神奇，令我哋贏得好輕鬆。」

其實太陽一班後備尋日打得咁出色，多得教練根特利信任佢哋，皆因佢居然夠膽喺第4節頭9分鐘，派晒後備落場，結果打出一段18:3攻勢奠勝。賽後根特利話：「我哋好認同所有球員嘅能力，佢哋亦一樣。」

湖人球星高比拜仁尋日狂取38分同10次助攻，成功超越前爵士球星馬龍升上NBA季後賽史上得分王第4位，可惜最後仍未能幫湖人贏波，賽後佢失望總結：「太陽嘅後備實在太勁。」

贏埋呢場，太陽今屆季後賽主場6連勝，是球會史上第2長紀錄，同時將季後賽主場連贏湖人紀錄增至7場。不過，湖人教練積遜以往46次帶隊喺季後賽領先2:0下都能出線，加上湖人今屆季後賽主場累積7連勝，聽日返主場讓太陽6.5分，捧上盤。