正所謂有心唔怕遲！瀕臨出局邊緣嘅魔術，尋日終於搵到「治人」方法，憑杜域侯活同尼爾遜嘅「擋切戰術」，最終作客加時以96:92勇挫塞爾特人，總場數追成1:3。聽日返番主場對「綠軍」，有力再下一城，讓2.5分上盤捧得過！

魔術開賽初段節節領先，一度咧住10分，雖然完場前被塞爾特人追成86平手，不過魔術喺加時階段憑尼爾遜射入2個關鍵3分波，成功避開被橫掃嘅厄運。

擋切戰術撕破「綠軍」

其實魔術尋日贏波，關鍵係杜域侯活同尼爾遜成功利用「擋切戰術」撕破塞爾特人嘅防守。魔術前3場每場平均只有33次「擋切」攞到28分，成功率得35.6%。但尋日就做出43次「擋切」攞到47分，成功率飆升至51.6%。結果杜域侯活取得32分同16個籃板，而尼爾遜就有23分同9次助攻。

NBA歷史上從未有球隊落後0:3下反勝晉級，至於北美所有職業聯賽，歷來亦只有4隊可以創造呢個奇迹，當中最著名要數波士頓紅襪喺04年MLB季後賽總決賽，以4:3反勝紐約洋基。