邊個話「80後」冇出息？塞爾特人嘅格連戴維斯同朗度尋日就用行動證明身價，率領「綠軍」主場以94:71蹂躪魔術，總場數輕鬆領先至3:0，呢個東岸冠軍睇嚟坐定粒六，事關NBA從來冇球隊連贏3場後反輸出局，「綠軍」進身總決賽絕對只係時間問題。

同上兩場一樣，塞爾特人尋日一開波已經拋離魔術，唔同嘅係，魔術今次喺尾段追都冇得追，第4節更一度落後32分，最後慘敗可謂意料中事。塞爾特人以加納特（右圖）為首嘅「三巨頭」今場發揮唔錯，各有雙位數得分，其中皮雅斯有15分同9個籃板，不過講到最Sharp醒，始終唔及格連戴維斯同朗度兩位同樣86年出世嘅新星，當中「Big Baby」格連戴維斯後備上陣射入全場最高嘅17分，朗度就交出11分同12次助攻嘅雙雙成績。

皮雅斯（左）完場前20秒已提早離場返更衣室，認真唔畀面魔術。(美聯社圖片)

放大圖片

皮雅斯寸爆未完場走先

由於一早奠定勝局，塞爾特人嘅皮雅斯寸爆，喺完場前20秒已經等唔切返入更衣室，仲一路同球迷講：「贏多一場，贏多一場就搞掂啦！」魔術尋日一眾球員表現都麻麻，杜域侯活只得7分，劉易斯更只得4分，教練雲根迪喺第3節更喺場邊意外被塞爾特人嘅加納特撞跌，認真黑仔。

雖然魔術全隊賽後都仲未肯認輸，揚言一定會力爭到底，不過NBA歷史上，從未有球隊連贏3場下出局，更何況「綠軍」之前10次領先3:0都全部過關，有4次更成功橫掃對手，所以聽日第4戰塞爾特人主場讓魔術4.5分，上盤值得再追㗎！