窮則變，變則通？喺東岸決賽落後0:2嘅魔術瀕臨出局邊緣，教練雲根迪當然唔敢怠慢，佢老人家決定喺聽日場Game3變陣出擊，派專人嘜死塞爾特人隊長皮雅斯，不過「綠軍」殺入季後賽之後個個着晒火，雲根迪呢招未必使得着。（無綫數碼頻道J2、now670台、廣東體育及中央5台周日早上8:30直播）

東岸決賽睇落五五波，勢估唔到塞爾特人頭兩場作客都贏波，逼到魔術陷入困境。當中「綠軍」射手皮雅斯兩戰攻入50分，狀態一流，魔術教練雲根迪決定改變防守策略，聽朝將委任小前鋒班尼斯「招呼」皮雅斯，卡特就改嘜雷阿倫。

卡特改嘜雷阿倫

對於教練嘅指示，班尼斯好有信心可以做好呢份Job：「皮雅斯呢期着晒火，所以我好想落佢面，我哋交過幾次手，我好熟悉佢嘅打法同步法，聽朝好有信心可以將皮雅斯凍結。」

唔知係咪驚樹大招風，Game2賽後喺Twitter聲稱要橫掃魔術、請對手食4隻光蛋嘅皮雅斯，尋日話自己唔係睇唔起魔術，只係認為「綠軍」返主場將有更大優勢。又係嘅，加納特、雷阿倫同朗度着晒火，主場出擊使乜驚你魔術先，讓4.5分一於要上盤。 文：雞髀拜仁