高比拜仁不愧為球星中嘅球星！呢位湖人王牌尋日又再發威，就算大部分時間畀太陽球員二人夾擊都冇有怕，周身刀張張利嘅「小飛俠」轉型校炮一樣咁掂，卒之交出13次助攻打破名宿Magic Johnson紀錄，協助湖人喺主場以124:112做低鳳凰城，總場數領先到2:0！

西岸季後賽決賽，喺Game One攻入40分嘅高比拜仁勁「屈機」，太陽都唔敢怠慢，尋日就以二人夾擊戰術招呼高比仔，搞到Kobe全場起手18次中得8球，只係得21分進帳，連續6場攻入30+嘅走勢亦都斷纜。

13次助攻平魔術手紀錄

見慣風浪嘅Kobe見勢色唔對，於是改變打法頻頻助攻為隊友鋪橋搭路，交出職業生涯嘅季後賽新高13次助攻，成為自96年「魔術手」莊遜之後，首位喺季後賽交出13次助攻嘅湖人球員，認真叻仔！有Kobe分波，好拍檔加素亦因而得益，貢獻全場最高嘅29分，協助球隊喺主場以124:112擊敗太陽，總場數領先至2:0。

鳳凰城教頭冇晒計

賽前寸對手奧當符碌嘅太陽前鋒史杜迪米亞，今場波畀湖人fans狂噓，全場只係攻入18分同搶到6個籃板，表現明顯受到影響。相反奧當全晚命中率達70%，攻入17分同拉下11個籃板，令史杜迪米亞冇聲出！賽後就連太陽教練根特利亦都發晦氣：「每次我哋作出調整防守湖人球員之後，佢哋總有辦法撕破太陽嘅防守，真係唔夠揪！」