本文重點
正所謂雨過天青，巫師爆冷攞到狀元籤，卒之為多災多難嘅球季帶嚟些少喜訊，如無意外嘅話，効力肯塔基嘅明日之星禾爾，將會係巫師嘅囊中物。更值得期待嘅，會方講明會留用阿連拿斯，由呢位大師兄帶住禾爾，巫師隨時成為下季NBA嘅奇兵。
搵阿連拿斯「湊大佢」
司職控衞嘅禾爾晨早就喺大學打響名堂，話就話佢同阿連拿斯撞位，不過「0號特工」搶分能力比組織力更強，若果有禾爾負責策劃，巫師嘅進攻體系實會完整好多。公牛今季成績唔係好，但係戴歷羅斯同軒域治嘅雙控衞戰術打得有聲有色，巫師照辦煮碗有望殺出新血路。
禾爾讀書成績唔錯，唔少Miss阿Sir都讚呢個g仔謙虛、低調，肯踏踏實實喺NBA球壇闖一番嘅話，前途絕對無可限量。但係計亨格比利就話，大師兄阿連拿斯先係禾爾能否成材嘅關鍵，畢竟呢位仁兄紀律麻麻，到時禾爾有樣學樣，又喺更衣室揸槍嘅話，咁巫師就喊都無謂！