湖人喺季後賽愈戰愈勇，睇個勢大有機會殺入總決賽爭衞冕，之但係積遜教練嘅前途依然唔明朗。據美國媒體消息，湖人雖然向「禪師」提出續約，但就要佢老人家坐底減薪6成，積遜身為冠軍級教頭，肯唔肯屈就呀？
一位駐華盛頓嘅記者尋日喺電台爆料，指湖人已經知會積遜要減人工，仲講到明新約唔會多過500萬美元年薪（約3,900萬港元），要知道「禪師」今季
緊1,250萬（約9,700萬港元）年薪，即係話嚟緊要減成60%人工，都咪話唔肉赤！
有記者就問積遜會唔會讓步，「禪師」回應話：「周圍都裁員減薪，或者湖人已經唔想再用我。肯唔肯減6成人工？換轉係你，你肯唔肯吖？」言下之意即係企硬冇彎轉！不過世事無絕對，積遜女友、湖人老闆個女貝絲就有信心honey會繼續留效：「減人工係冇癮㗎啦，但我肯定積遜想幫湖人創造更多歷史，佢應該會留低。」