「綠軍」又贏一場！憑皮雅斯出色發揮，塞爾特人尋日作客又以95:92擊敗魔術，總場數領先至2:0，晉級總決賽可以話坐定粒六，難怪皮雅斯賽後寸爆，向主場球迷講「明年再見」，擺明話你聽「綠軍」可以橫掃魔術出局。

卡特撞傷射失關鍵罰球

塞爾特人尋日大部分時間領先，更一度Lead到11分，雖然完場前被魔術反超前，但仍憑穩定演出再贏1場。當中皮雅斯射入28分，另外朗度亦有25分進帳。魔術嘅杜域侯活今場回勇勁入30分，可惜隊友卡特撞傷左手，搞到完場前射失2個重要罰球，成為落敗關鍵。

隨住尋日贏波，塞爾特人總場數經已領先2:0，賽後皮雅斯寸爆，竟然向主場球迷揮手講拜拜，有記者更大爆皮雅斯向球迷講「See y'all next year」（明年再見），似乎暗示塞爾特人嚟緊2場返主場都可以贏波，以4:0橫掃魔術出局，想睇佢哋比賽就要等下年。東岸決賽第3戰將會喺香港時間周日早上進行。