經過一個禮拜休息，之前一直受膝積水傷患困擾嘅「小飛俠」高比拜仁，尋日終於喺西岸決賽大顯身價，狂轟40分協助湖人主場以128:107擊潰鳳凰城太陽旗開得勝，總場數暫時領先1:0。

高比拜仁喺今屆季後賽初段表現未如理想，全因膝頭、足踝、手指同背脊都有傷，不過隨住湖人早前橫掃爵士，高比拜仁獲得一個禮拜休息，尋日一復出立即脫胎換骨，當中喺第3節更加着火射入21分，最終全場豪取40分，成功帶領湖人打響頭炮。太陽教練根特利亦承認今場只係輸畀高比一個：「高比完全控制今場比賽，我本來覺得可以頂得住佢，但當佢射波射得咁準，你根本得個睇字。」

季後賽第11次得分40分+

連埋尋日，高比拜仁喺季後賽已經第11次攞到40分+，同時係第71次攞30分+，名列季後賽史上第4，落後第3位嘅前湖人名宿謝利韋斯只有3場。佢嘅季後賽總得分亦達到4,690分，距離「郵差」馬龍嘅4,761分只有71分，依高比目前嘅走勢，相信喺呢個系列賽就可以取代馬龍升上季後賽得分王史上第4位，聽日湖人繼續喺主場讓太陽7.5分值得再追！

放大圖片	放大圖片	放大圖片