本文重點
塞爾特人守贏魔術！NBA東岸決賽尋日正式爆發，結果爆出一個小冷門，「綠軍」憑3大杉成功箝制「魔獸」杜域侯活，作客以92:88勇挫魔術，打破對方今屆季後賽不敗身，先拔頭籌領先1:0！
挾上圈淘汰騎士餘威，塞爾特人尋日作客魔術持續大勇，一度領先主隊20分。雖然完場前被追剩2分，幸最後仍保持勝果至完場，當中拉舒華萊士、柏堅斯同格連戴維斯功勞最大，事關佢哋成功防守杜域侯活，令「魔獸」全場只得13分同12個籃板。
3大杉成功箝制魔獸
另一個關鍵係雷阿倫射入25分，賽後呢名NBA史上第2多產嘅3分射手，大爆尋日之所以咁勁，全因賽前狂煲魔術比賽嘅錄影帶，搵到破解對方防守嘅方法：「我知道佢哋嘅防守會迫令我離開自己『食胡位』，我之前成個禮拜都一直狂睇魔術嘅比賽，發現一有射手接波，佢哋就會逼佢出外圍，所以我決定不停要波，搵空間投射。」
隨住尋日輸波，魔術喺今屆季後賽8連勝亦告一段落，不過佢哋聽日主場對塞爾特人話晒仲有主場之利，為保出線絕對唔容許再輸，少讓4.5分應該可以開番次上盤！ 文：勒邦芝士