隨住塞爾特人以4:2淘汰騎士，「綠軍」對魔術嘅東岸決賽，聽日凌晨亦率先爆發。兩隊上季喺東岸4強會師，遺憾當時塞爾特人缺少加納特，魔術尼爾遜亦因傷避戰，可幸兩人今季都冇病冇痛，而且狀態奇勇，帶領隊友過關斬將，呢兩名戰將嘅演出，勢成呢場東岸總決賽「人、魔」大戰嘅關鍵！（now670台周一凌晨3:30直播）

上季東岸4強魔術總場數以4:3險勝塞爾特人晉級，當時外間均認為「綠軍」缺少「Big3」之一嘅「KG」加納特係輸波關鍵。今屆「KG」冇病冇痛，而且愈打愈好，特別喺上圈對騎士，由以前喺常規賽平均每場得14.3分同7.3個籃板，升至18.8分同8個籃板，搞到騎士嘅占美臣同奧尼爾一戙都冇！須知騎士當初簽佢哋兩個返嚟就係想用嚟箝制魔術嘅杜域侯活，可想而知「KG」目前狀態有幾弗！

騎士教練大讚KG

見到自己「雙塔戰術」畀加納特一手摧毀，騎士教練米克布朗都甘拜下風，並識英雄重英雄，預測加納特有機會擊敗「魔獸」杜域侯活，殺入NBA總決賽：「加納特就係冠軍嘅代名詞，佢曾經贏過冠軍，係一名好有經驗、好專業嘅球員，而且心理質素極之好，攻守兼備，真係無得彈。」

「綠軍」隊長皮雅斯更表示，「KG」回勇嚟得極之合時，表示如果冇佢，塞爾特人或者冇可能贏總冠軍。

尼爾遜季後賽得分飆升

上季東岸盟主魔術今季持續強勢，連續兩圈以4:0橫掃山貓同鷹隊。好多人都歸功新加盟嘅「飛人」卡特同杜域侯活，但其實尼爾遜亦功不可沒。呢位後衞喺今季季後賽嘅得分，由之前常規賽嘅12.6分一下子飆升至20.5分，整體發揮唔差得過朗度，隨時成為魔術對付塞爾特人嘅秘密武器！聽日主場讓「人」6.5分，上盤捧得過！