太陽強援回歸！NBA西岸決賽喺香港時間下個禮拜二就會正式展開，賽前太陽收到好消息，就係養傷多時嘅中鋒羅賓盧比斯（下圖右）經已傷愈，有望及時復出抵抗湖人嘅「三塔」。

奧當受過教訓唔敢輕敵

尋日太陽自橫掃馬刺4:0後首次進行操練，右眼腫晒嘅拿殊、格蘭希爾同積遜李察遜都冇去到，但自3月28號背脊受傷一直缺陣嘅羅賓盧比斯就終於復出。教練根特利表示盧比斯狀態唔錯，加上之前提早擊敗馬刺多咗6日休息，相信盧比斯可順利復元趕及西岸決賽復出。本身同籃網嘅布克盧比斯為孿生兄弟嘅羅賓盧比斯，自季中榮升太陽正選後，平均每場有11.3分、6.3個籃板同1.1次封波，復出絕對有助太陽抗衡湖人嘅加素、拜林同奧當。

另一方面，西岸第一種子湖人近排漸入佳境，自從第一圈作客雷霆連輸兩場後，打後取得6連勝。不過一眾球員對於喺西岸決賽對太陽都唔敢鬆懈，皆因湖人喺06同07連續兩年季後賽輸畀太陽，其中06年更喺領先3:1下反輸3:4出局，湖人主將奧當表示至今仍未忘記到呢啲慘痛回憶，希望今屆可以擊敗太陽成功復仇。