魔術強勢闖東岸決賽！佢哋尋日作客又以98:84玩殘鷹隊，總場數以4:0橫掃對手出線，每場平均炒鷹隊25.3分，成為季後賽史上最一面倒勝利，即管睇吓魔術喺東岸決賽對騎士或者塞爾特人，仲會唔會贏得咁輕鬆！

太陽湖人西岸決賽碰頭

相比起前3仗，鷹隊尋日表現依然冇乜起色，雖然成功限制杜域侯活只得13分，弊在魔術仲有大把人識入波，最終憑卡特射入22分，劉易斯同尼爾遜又分別攞到17同16分，繼上圈對山貓後，再次以4:0橫掃對手出線，而且平均每場贏鷹隊25.3分，創出NBA季後賽史上最懸殊嘅系列賽。

「飛人」卡特話佢哋贏得咁輕鬆絕對實至名歸：「我哋每個人都好集中精神，實在令人難以置信，絕對係一次畀我贏總冠軍嘅好機會。」由於騎士同塞爾特人暫時總場數打成2:2，至少要打多2場先分到勝負，魔術大把時間休息準備，有望再次殺入總決賽。

至於上季贏魔術嘅湖人，尋日亦憑高比拜仁同加素合力轟入65分，作客以111:96輕取爵士，總場數贏4:0出線，喺西岸決賽將會師太陽。