湖人進軍西岸決賽在望！尋日佢哋作客爵士，雖然內線受到嚴密看管，不過憑當家球星高比拜仁射入35分，最終以111:110險勝爵士，場數領先3:0。高比仔仲取代名將渣巴，成為球會史上季後賽入波王添！

高比榮升季後賽入波王

吸取咗上仗被拜林等高佬打爆內線嘅教訓，爵士今仗刻意加強內線防守，可惜又走漏外線，被湖人嘅高比拜仁、阿堤斯同費沙合共轟入7個3分波，其中高比拜仁仲獨取35分，帶領湖人贏波、將領先優勢擴大至3:0之餘，高比拜仁喺季後賽仲累積射入1,649球，打破由渣巴保持嘅1,643球紀錄，成為球會史上季後賽入波次數最多嘅球員！湖人乘勇聽朝再鬥爵士，受讓4.5分勁抵玩！

東岸4強方面，鷹隊昨仗雖有主場之利，不過仍然搵唔到克制魔術中鋒杜域侯活嘅辦法，尋日再被杜域侯活取得21分及16個籃板，鷹隊最後以75:105落敗，場數落後至0:3，聽朝主場出擊根本讓唔起，魔術受讓2.5分梗係捧下盤！