勒邦占士緣盡季後賽？你冇聽錯！呢位一直被認為係打不死嘅球星，近日被爆右手手肘傷勢加劇，不足10日內竟然要做3次磁力共振，依家連攞起籃球都有問題，隨時提早收咧，騎士爭標認真危危乎！

其實早喺上圈對公牛時，占士已承認自己右手手肘有傷，不過當時外間均認為以「大帝」超人嘅身體質素，應該冇咩問題，直至日前主場對塞爾特人，「大帝」狀態急跌，全場只得24分，而且大部分時間轉用左手帶波，傳媒先開始揣測占士傷勢可能比預期嚴重。

10日內做3次磁力共振

終於喺尋日有知情人士爆料，指勒邦占士手肘嘅傷勢已經影響手臂嘅動作，依家甚至連攞籃球都有難度，已經唔適合再落場比賽。如果唔想加劇傷勢，最好就要休息。雖然以上消息未經騎士證實，但可以肯定嘅係，勒邦占士最近喺10日內，三度去診所接受磁力共振，治理手肘傷勢。為咗支持占士，最近有人以「占士右手手肘」登入Twitter，結果喺短短幾日，已經累積4,783個追隨者，小記尋日嘗試上網查閱，可惜該版面因為太繁忙而未能開啟。

入選最佳防守一隊

毫無疑問，騎士近年成績彪炳，可謂全靠占士單天保至尊，冇咗佢，騎士只係一支實力普通嘅球隊。早幾日占士負傷上陣，主場都畀塞爾特人打到落花流水，一旦真係提早收咧，相信爭標機會凍過水，聽日第3戰騎士作客讓塞爾特人1.5分，根本唔值捧！

占士可唔可以再打季後賽仍然未知，不過佢之前喺常規賽嘅表現，仍然獲得肯定，尋日佢就入選今季NBA最佳防守一隊（見附表），呢次亦係佢連續第2年當選。