一隊波有1個「籃板王」櫻木花道已經夠勁，何況仲有3個！湖人「三塔」加素、拜林同奧當，尋日齊齊化身日本漫畫《Slam Dunk》主角櫻木花道，合力搶走44個籃板，帶領湖人喺季後賽次圈主場以111:103擊敗爵士，總場數領先2:0。

其實爵士入到第2圈硬撼湖人根本冇得打，事關呢支西岸第5種子有基利蘭高同奧古兩名「Big Men」缺陣，籃底完全畀湖人玩晒。

好似尋日咁，雖然湖人全場有20次失誤，阿堤斯3分波7射僅1中，但湖人最終仍憑籃底威力再下一城，單喺內線就獲取64分，籃板更取得58:40嘅優勢，成為「紫金兵團」近20年季後賽第4多紀錄，另加13個封波，當中加素取得22分同15個籃板，中鋒拜林亦有17分同14個籃板，而奧當就貢獻15個籃板，爵士球星布沙有球被奧當封波後，補射再被加素封走，可以話係湖人全場控制內線嘅最佳縮影。

加素拜林奧當控制內線

全場射入30分嘅高比拜仁，賽後亦大讚「三塔」威力：「佢哋真係打得非常好，加素同拜林今日喺籃底所做嘅嘢實在冇得彈。奧當後備上陣搶到15個籃板，就更令人難以置信。」對於湖人呢種打法，爵士教練史龍都話冇符：「湖人今晚所搶嘅籃板實在唔到我哋控制。」迪倫威廉士亦有同感：「我哋每次一入籃底，對方就有2至3個人喺入面，真係好影響我哋嘅發揮。」

贏埋呢場後，湖人總場數已經領先2:0，球會對上41次出現呢個情況，有40次可以成功出線，不過爵士球星布沙表示一定會力戰到底，第3戰將會喺香港時間嚟緊周日移師鹽湖城舉行。

湖人季後賽籃板紀錄

日期 籃板 對手

1991/05/14 65* 勇士

2001/05/25 63* 馬刺

2000/05/16 59* 太陽

2010/05/04 58* 爵士