雖然喺常規賽MVP選舉未獲「第1選票」，球迷又拒着打氣Tee，不過高比尋日用行動證明身價，關鍵時刻連入11分，助湖人喺季後賽次圈以104:99擊敗爵士，先拔頭籌。

由於受傷患困擾，高比拜仁喺啱啱公布嘅常規賽MVP選舉中屈居第3，本來係意料中事，但勢估唔到「小飛俠」居然一張「第1選票」都冇，連排第4嘅杜域侯活都不如。尋日主場對爵士，湖人賽前免費派發幾千件白色Tee畀球迷，希望提升比賽氣氛，點知大部分球迷都因為睇唔起爵士而拒絕着上。

湖人反勝104:99拔頭籌

好彩湖人主將高比冇因為咁氣餒，全場射入31分，當中喺完場前4分鐘更連取11分，成為「紫金兵團」主場反勝爵士104:99嘅最大功臣。賽後高比表示：「有咁多不利消息的確令呢場波變得唔易應付，但正因為有難度，令我變得更有動力去挑戰自己。」賽後爵士球星迪倫威廉士亦盛讚高比嘅表現：「高比幾下射波都太令人難以置信，冇得再靚。」

放大圖片	放大圖片	放大圖片

雖然總場數暫時只係領先1:0，不過對於湖人嚟講，出線基本上坐定粒六，事關教練積遜以往帶隊試過45次贏出系列賽首仗，最終全部成功晉級，出線率達100%，有咁勁嘅數據支持，聽日湖人再次主場出擊讓爵士6.5分，你話上盤又點可以錯過？