03/05/2010

播放本新聞相關短片

「Mo仔」入樽振軍心騎士反勝綠軍

出爐MVP勒邦占士大發神威!「大帝」尋日負傷上陣依然表現勇猛,遠射、剷籃、助攻瓣瓣有,加上「Mo仔」莫威廉士獻出職業生涯首次入樽振奮軍心,帶挈主場出擊嘅騎士扭轉落後劣勢,以101:93反勝塞爾特人,東岸4強戰旗開得勝!

賽前NBA官方證實勒邦占士當選今季常規賽最有價值球員,呢位新科MVP成功衞冕殊榮當然興奮到爆,直情連手㬹傷勢都唔當係一回事,24射12中攻入全場最高嘅35分之外,仲貢獻7個籃板同7次助攻嘅「準三雙」成績,絕對係騎士贏波嘅最大功臣。

首次入樽震撼全場

查實塞爾特人半場仲領先緊11分,不過得6呎1吋高嘅「Mo仔」就喺第3節獻出佢嘅第一次,喺皮雅斯頭頂入樽令全場兩萬名騎士Fans尖叫,亦都激發起一班隊友嘅鬥志,打出一段21:9嘅攻勢,係騎士能夠反敗為勝嘅關鍵。

賽後占士話:「我一早就叫莫威廉士試吓入樽,我知效果肯定震撼過我好多!」騎士贏波展示王者霸氣,聽朝Game2有望再下一城,主場讓7.5分要上盤。