社交網站Twitter大受歡迎，唔少藝人同球星都鍾意透過自己個blog同fans拉近距離，効力速龍嘅前鋒保殊都算出位，呢位「龍王」竟然喺留言板上問前程，希望fans點條明路過佢行。
今季場均數據達24分同10.8個籃板嘅保殊，係呢個夏天最炙手可熱嘅自由身球員之一，以佢今時今日嘅地位真係唔愁冇人吼，正所謂良禽擇木而棲，轉投邊隊先係最重要嘅問題。
保殊於是決定集思廣益，尋日喺Twitter上面問Fans：「下季我應該去邊？點解？」唔夠一個鐘之後又問：「或者我應該問吓大家，留隊還是離隊？」睇嚟佢離開速龍事在必行！