騎士同塞爾特人聽朝引爆東岸4強大戰！焦點所在唔使問阿貴，當然係睇勒邦占士點樣力抗「綠軍」3大巨頭。據美國當地消息，「大帝」喺上一輪系列賽整親手㬹，今場將會改變策略靠剷籃搵食，究竟呢招行唔行得通真係要拭目以待喇！

話說騎士上圈淘汰公牛，占士喺Game5整親手㬹，照完X光同磁力共振檢查後，發現隻右手㬹附近肌肉受損，搞到佢尋日操練要搵左手射波，情況都幾令人擔心。

手㬹受傷靠剷籃搵食

打不死嘅占士就一於少理，仲向騎士Fans承諾唔會缺席任何一場比賽：「好在冇結構上嘅損傷，亦唔需要做手術，我敢寫包單會落場鬥塞爾特人。不過如果隻手真係唔掂，咁我會打得聰明少少，唔做太多遠射，靠剷籃搶分。」

馬刺太陽西岸次圈交鋒

塞爾特人隊長皮雅斯亦唔敢怠慢：「就算占士手㬹受傷，依然勁過9成以上嘅NBA球員，我會當佢100%狀態咁嘜！」不過成隊騎士最打得係占士，今鋪紮住上充滿隱憂，聽朝有地利但要讓塞爾特人7.5分確實太狠，寧敲下盤。

另外，鄧肯尋日貢獻17分、10個籃板同5次助攻，率領馬刺以97:87擊敗小牛，總場數贏4:2晉級，將喺西岸4強硬撼尋日以99:90擊敗拓荒者、總場數贏4:2晉級次圈嘅太陽。