絕處可以逢生，但係要做到就必須上下一心！丹佛金塊尋日回師主場硬撼爵士，雖然中鋒連尼早就傷出，但反而激發起一眾戰將嘅鬥志，絕地反擊以116:102擊退爵士，將總場數追到2:3！

公鹿獵「鷹」反先

賽前總場數落後緊1:3嘅金塊，尋日再輸就Game Over，中鋒連尼更加喺第2節尾段畀爵士前鋒布沙踩親膝部，被迫退下火線。不過金塊球員冇自暴自棄，反而愈打愈起勁，安東尼攻入全隊最高嘅26分同搶到11個籃板，JR史密夫更喺第4節射入兩個關鍵3分波，全隊有6位球員得分達雙位數，成為今場致勝關鍵。

喺Game4輸波後大呻孤掌難鳴嘅安東尼，賽後大讚隊友做到嘢：「單靠我一個人係贏唔到爵士，好在其他隊友個個幫到手，只要團結一致嘅話，金塊可以戰勝任何球隊！」

賽後有消息指連尼膝傷情況嚴重，預計比特奴同基斯安達臣將獲委以重任，內線實力無疑受到削弱，聽朝要力拒布沙嘅進襲唔易，爵士主場讓2.5分要上盤。另外，公鹿尋日作客91:87擊敗鷹隊，總場數反先3:2。