皮雅斯絕殺送熱火上不歸路！一心諗住靠主場翻身嘅熱火，尋日遭受嚴重打擊，主將韋迪獨力難支，喺關鍵時刻更傷出，最後眼白白睇住皮雅斯射入奠勝入球，造就塞爾特人總場數遙遙領先3:0，好大機會成為首支晉級球隊。

為保出線機會，賽前落後0:2嘅熱火尋日孤注一擲，奈何太過倚賴韋迪，榨乾咗「閃電俠」。完場前14秒韋迪射3分波諗住打救球隊，點知落地時誤踩雷阿倫隻腳抽筋倒地，全場有34分嘅佢，最後只能喺場邊睇住對手皮雅斯喺響鐘前射入絕殺球（左圖），輸98:100。

熱火韋迪完場前傷出

全場有32分嘅皮雅斯賽後表現得戚：「呢啲絕殺我不知做咗幾多次，當時我同教練李華士講：『將個波交去我右邊。』因為我想完場前喺食胡位射波。」韋迪被換出場後，狂飲健康飲品補充體力，諗住加時再搏殺，可惜最後目睹球隊輸波，賽後佢接受靜脈注射後，表示聽日應可繼續上陣。不過NBA從未有球隊落後0:3下反勝出線，何況打完3場後，熱火實力擺明唔及對手，聽日宜博作客讓2.5分嘅「綠軍」。

同日馬刺憑爆鼻嘅真路比利喺第4節射入全場15分中嘅11分，加上鄧肯貢獻25分，主場以94:90擊敗小牛，總場數反超前2:1，聽日再主場出擊讓小牛1.5分，值得繼續支持。