24/04/2010

播放本新聞相關短片

公牛雷霆「老八」贏「一哥」

「老八」大反擊!之前兩場作客都輸嘅公牛同雷霆,尋日返番主場成功行出「老八」傳奇第一步,分別砌低騎士同湖人兩大「一哥」,總場數追成1:2,當中戴歷羅斯同杜蘭特更盡顯新世代波神威力,搶晒勒邦占士同高比拜仁風頭。

之前兩仗表現都只係一般嘅戴歷羅斯,尋日返番主場大有進步,全場轟入31分,完場前畀「大帝」勒邦占士緊纏仍毫無懼色,最終帶領公牛主場以108:106險勝騎士。由於羅斯仔今仗表現實在太出色,喺第3節開始更獲全場球迷不停大叫「MVP」支持,賽後羅斯都話受寵若驚:「我聽到後差啲暈低,希望有一日我會達成呢個目標,但目前我只會諗點樣幫公牛出線。」

戴歷羅斯搶占士風頭

至於雷霆方面,尋日係搬到俄克拉何馬後首次喺主場打季後賽,唔知係咪因為呢個關係,「KD」杜蘭特初頭手風勁唔順,頭19射射失15球,好彩之後表現好轉,最終全場取得29分同19個籃板,同時仲Mark到高比拜仁一戙都冇,令呢位得分王全場29投10中只有24分之餘,最終仲帶領雷霆主場以101:96擊敗湖人。

布魯克斯膺最有進步球員

杜蘭特好開心:「可以擊敗衞冕冠軍令我哋進步唔少,不過我哋仍有好長嘅路要行。」今仗超越謝利韋斯、成為湖人史上季後賽得分王嘅高比拜仁,賽後亦大讚高佢3吋嘅杜蘭特Mark佢Mark得好出色。連高比都咁講,聽日雷霆主場讓2.5分,上盤值得再追。

另外,雖然火箭今季無緣季後賽,不過後衞布魯克斯尋日就以403分,力壓雷霆嘅杜蘭特、灰熊嘅馬克加素同馬刺嘅佐治希爾(全部101分),當選今季最有進步球員,真係恭喜晒!