光：光頭仔 強：強尼 鍾：鍾國雄 Sam：肥Sam

光：大龍鳳30號就公演，你哋幾位依家心情點先？

強：興奮又期待，好想快啲來臨。

光：聽講開Show前你哋會同班Angels跳番Part 3分鐘嘅熱舞，練成點呀？

鍾：雖然有運動開，身體協調性Ok，之但係節奏感都仲係差咗少少。

Sam：計我話我哋跳成點都唔緊要，到時啲觀眾都係睇班Angels跳㗎啦！

光：扮鬼扮馬係你哋強項，到時邊個會扮美斯，邊個扮C朗？

鍾：我哋會扮旺角場阿伯，或者圍繞足球嘅人物，就偏偏唔會扮球場入面嘅人。

光：咁其實個Show係講乜？

鍾：我哋用自己做球迷嘅角度，用戲劇甚至係誇張手法，透過舞台表達出嚟，有啲事大家平時唔覺意，但一睇就有共鳴。

強：例如大家想專心睇波時，心入面好想叫女朋友唔好阻住，但又講唔出口咁。

Sam：個Show全長2個鐘，希望可以將訊息畀到觀眾，除咗希望聽到掌聲之外，我哋最想就係做到呢樣嘢。

光：話晒第1次，大家有冇向前輩取經？

鍾：以前都冇啲咁嘅足球Show，都唔知問邊個好，但冇比較都係好事，我哋今次未必表現得最好，但點都係破天荒吖。我哋估計到時最大挑戰，就係點樣去回應觀眾即時反應，呢樣就最考功夫！