加納特停賽使乜驚呀！塞爾特人仲有格連戴維斯！「綠軍」尋日就憑藉呢名綽號「Big Baby」嘅替工大發神威，再做季後賽奇兵，主場以106:77大炒熱火，總場數已經拋離2:0，出線形勢大好。

塞爾特人球星加納特因為喺首戰一㬹鋤落熱火嘅昆田李察遜塊面度，尋日被罰停賽，不過代替「KG」上陣嘅格連戴維斯卻交足功課，頻頻利用龐大身軀撞散熱火內線，結果上陣29分鐘輕鬆取得23分同8個籃板。

「魔獸」膺最佳防守球員

賽後「綠軍」主將皮雅斯對於格連戴維斯有咁好表現一啲都唔奇：「上季我哋輸畀魔術，格連戴維斯都係正選，我哋好清楚佢嘅能力。」事實上，加納特上季因傷缺席季後賽，格連戴維斯代替佢14場打正選，結果每場平均有15.8分同5.6個籃板。可憐熱火尋日諗住藉「綠軍」有加納特停賽偷雞，點知最後卻大敗，教練史普斯達賽後認為咁都輸好尷尬。

放大圖片	放大圖片	放大圖片

另外，NBA尋日終於公布今季常規賽第一個獎項，魔術中鋒杜域侯活以大熱姿態（576分），擊敗鷹隊嘅祖斯史密夫（136分）同山貓嘅謝勒華萊士（113分）成功衞冕最佳防守球員，真係恭喜晒！