之前喺常規賽玩晒嘅「KD」杜蘭特，尋日終於見識到季後賽嘅慘烈，喺處子戰畀人盯死，由得分王淪為浪射王，結果令雷霆作客以79:87不敵湖人。賽後湖人「金毛」阿堤斯仲揚言嚟緊會加強防守，勢要令「KD」死得更慘！

雷霆球星杜蘭特之前喺常規賽大勇，更力壓勒邦占士成為NBA史上最年輕得分王，可惜尋日喺職業生涯首場季後賽明顯輸經驗，好幾球射空氣，加上被湖人球星阿堤斯Mark到實，結果全場24射得7中只有24分。

「KD」24射僅7中

賽後杜蘭特好失望：「我嘥咗好多平時應該入嘅波，如果我入多4、5球，形勢可能好唔同！」不過今場特別染上一頭金髮，表示只係為咗吸引球迷嘅湖人「野獸」阿堤斯，賽後就揚言嚟緊仲要「KD」有排受：「我覺得自己唔值得為今日嘅防守感到驕傲，因為我仲可以做得更加好。」

放大圖片

放大圖片

其實湖人尋日贏波另一個關鍵，就係傷愈復出嘅拜林同加素完全控制內線，合共搶到25個籃板同有7次封波，反觀高比拜仁表現就喺水準之下，全場射19球得6中只有21分，不過依然足夠令雷霆連續11場作客輸畀湖人（連埋搬竇前嘅超音速），創出季後賽作客連輸畀單一對手第3長紀錄。

湖人積遜拔頭籌全出線

隨住尋日贏波，面對今季NBA最年輕、全隊平均年齡只得25歲42日嘅雷霆，一個極有利數據已傾向湖人，就係教練積遜以往45次帶隊贏出系列賽嘅首戰，最終全部出線。聽日湖人喺主場對雷霆讓7.5分，值得再追上盤！