本文重點
NBA季後賽喺周日凌晨展開，首日戰果極之正路，4支種子排名較高球隊都順利贏波，當中勒邦占士同安東尼呢對「03年黃金孖寶」更大發神威，成為騎士同金塊旗開得勝嘅最大功臣，相信聽日各自再喺主場出擊可以繼續開上盤！
安東尼創個人得分新高
賽前外間估計公牛會畀到騎士一定威脅，點知首場賽事，騎士主場輕鬆贏96:83，早前休戰多場嘅「大帝」勒邦占士，一復出就取得24分6個籃板5次助攻同4次封波。至於瘦咗20磅嘅奧尼爾，傷愈復出後首戰，更好似返番10年前嘅當打時期，上陣25分鐘攞到12分5個籃板同3次封波，仲搞到公牛中鋒諾亞無啖好食。賽後「大帝」大讚騎士好有冠軍相，奧尼爾更揚言要連贏16場，成為NBA首支全勝攞總冠軍嘅球隊，聽日再喺主場對公牛讓10.5分，上盤要捧！
西岸4號種子金塊，尋日主場面對第5種子爵士，就憑同占士一樣係03年出道嘅安東尼射入個人季後賽新高42分，加上後備JR史密夫喺第4節射入全場20分中嘅18分，包括連續射入3個3分波，主場以126:113輕取爵士。爵士輸波不特止，中鋒奧古仲受傷離場，聽日好大機會缺陣，作客金塊受讓5.5分都捧唔過！
