萬眾期待嘅NBA季後賽，周日凌晨正式Tip Off！首日4場賽事包括凌晨3:00開波，打頭陣嘅騎士對公牛、鷹隊對公鹿、塞爾特人對熱火同金塊對爵士。本來常規賽盟主騎士對住東岸第8名出線嘅公牛應該實食無黐牙，可惜騎士季尾頻頻失利，公牛隨時藉着3大利好因素，書寫史上最「牛」老八傳奇！

公牛近年喺常規賽唔算突出，好似上季就以東岸第7種子殺入季後賽，第1圈仲要硬撼衞冕冠軍嘅塞爾特人，初時個個都認為佢哋會食蛋出局，點之公牛卻嚇人一跳，4度同「綠軍」打至加時，第6回合更打足3次加時後，主場以128:127險勝塞爾特人。雖然公牛喺第7場決勝戰作客不敵塞爾特人，總場數以3:4飲恨出局，但表現獲得一致讚賞。

季後賽對騎士未輸過

今季公牛再次喺常規賽以弱者示人，不過翻查數據，公牛今季喺常規賽4對騎士打成2:2，各贏2場。如果睇番往績仲恐怖，因為騎士喺季後賽從未贏過公牛，88年同89年第1圈都輸2:3、92年東岸決賽輸2:4、93年東岸4強輸0:4、94年第1圈輸0:3，公牛簡直係騎士嘅剋星。聽日公牛第一擊作客騎士受讓10.5分，下盤捧得過！