公牛今季認真係多事之秋,好似季中為咗清洗薪酬空間,將沙蒙斯送去公鹿,另外將特魯斯湯馬士送去山貓,季尾更爆出教練迪尼高曾同副會長柏臣講手,不過公牛今季常規賽成績麻麻,主因係一直受傷兵困擾,3月頭時更一度創出10連敗劣績,不過隨住諾亞同鄧格先後復出,公牛喺季尾開始慢慢由病牛轉變成狂牛,喺最後8場取得6勝2負,其中更擊敗主要競爭對手速龍,成功趕上尾班車。
占士忌三分
當中「籃板王」諾亞傷愈復出後,更頻頻展現出超乎常人嘅體能,賽前佢透露將會同隊友夾擊勒邦占士,更揚言要「震撼世界」令騎士出醜,難怪「大帝」都忌佢三分:「我覺得諾亞真係一名好犀利嘅球員,佢真係一名好有潛質嘅新星,不過我已經做好準備,到時佢將會見到我變成另一隻怪獸。」