公牛嘅戴歷羅斯同軒域治，今季表現時好時壞，不過自從踏入4月後，呢對「後場孖寶」終於醒覺突然大爆發。當中羅斯仔各項數據都明顯「升呢」，命中率由3月嘅48%升到54%，場均助攻更升至7次，得分更暴升至25.4分，比全季平均攞到嘅19.6分，足足高出5.8分！喺常規賽尾二一場對塞爾特人，更取得職業新高嘅39分，連出名防守好嘅綠軍都投晒降。
綠軍都頂唔順
至於軒域治就更加神奇，由季初被貶後備，到季尾成為必然正選，喺最後7場賽事，有3場得分成為今季自己Top 3，當中對塞爾特人更轟入30分。賽後軒域治表示：「我好開心自己重新獲得上陣同表演機會，希望我可以繼續維持着火表現，帶領公牛取得佳績。」