16/04/2010

播放本新聞相關短片

公牛劏貓坐季後賽尾班車

NBA季後賽16強對陣尋日終於全部誕生!當中公牛作客勇擒山貓,成功逼走速龍趕上尾班車。另外杜蘭特力壓勒邦占士成為NBA史上最年輕得分王,即管睇吓「KD」嚟緊第1圈率領雷霆挑戰高比嘅湖人,可唔可以再創歷史!

杜蘭特成最年輕得分王

雖然今季備受傷兵、內部爭鬥同交易困擾,但公牛尋日喺關鍵一戰仍咬緊牙關,最終憑戴歷羅斯射入27分,加上諾亞攞到21分同13個籃板,作客以98:89擊敗山貓,力壓同日主場以131:113大勝紐約人嘅速龍,以1場勝仗之差,連續第2年殺入季後賽。賽後諾亞好激動:「你知唔知我點解鍾意公牛?因為當我哋陷入難關時,仍然覺得球隊冇沉過,仍然好相信對方。依家可以殺入季後賽真係好開心,我認為我哋絕對值得攞到!」

同日雷霆憑杜蘭特射入31分,主場以114:105擊敗灰熊。賽後杜蘭特以30.1分,力壓29.7分嘅勒邦占士成為得分王,同時以21歲之齡,超越1948年得主沙洛夫斯基(22歲),成為呢項獎項最年輕得主。至於魔術中鋒杜域侯活就成為籃板王(13.2個)同封阻王(2.8個),拿殊就成為助攻王(11次),而朗度就成為偷波王(2.35次)。